Aprann servi OmegaT an zis sink minit!

Prepar enn nouvo proze

Not: Lor Mac, servi tous Command olie tous Control.

Pou koumans servi OmegaT, kree enn proze ki pou kontenir tou ou bann fisie, setadir fisie sours, bann memwar tradiksion, bann gloser ek tradiksion final (fisie sib). Dan meni Proze, swazir Nouvo... ek met nom ou proze. Pa bliye lanplasman proze-la, parski ou pou bizin aksed sa dosie-la apre.

Apre ki ou finn nomm ou proze, enn lafnet Kree enn Nouvo Proze pou aparet. Dan lao sa laftnet-la, swazir lang fisie sours ek lang tradiksion, e klik lor OK pou kontigne.

Ninport ki moman, ou kapav servi sortket Ctrl+E pou retourn lor bann lezot paramet dan sa lafnet-la.

Answit, laftnet Bann Fisie Proze pou ouver. Klik lor Kopie bann Fisie ver Dosie Sours... pou swazir ou bann fisie sours. OmegaT pou kopie bann fisie ki ou finn seleksione dan sou-dosie /source/ dan proze ki finn fek kree la. Enn fwa ki bann fisie sours sarze dan pano Editer, ou kapav ferm lafnet Bann Fisie Proze.

Tradir fisie-la

OmegaT pou montre ou segman par segman pou tradir. Kan ki ou finn tradir enn segman, apiy lor Ctrl+U pou al lor prosin segman ki pa finn ankor tradir (ouswa Ctrl+Shift+U pour al lor prosin segman ki finn fini tradi). Ninport ki moman ou oule vizializ ou tradiksion final, apiy lor Ctrl+D pou kree bann dokiman final dan sou-dosie /target/ ou dosie proze. Pandan tradiksion, servi bann meni Edit ek Al pou realiz diver fonksion bien pratik.

Valid ou bann baliz

Si ou bann fisie sours zot bann fisie formate, par exanp si zot dan format Microsoft Word, LibreOffice Writer ouswa HTML, OmegaT pou konverti formataz-la an bann baliz otour ou text. Souvan, bann dokiman ena ousi bann baliz ki pena okenn rapor avek formataz me ki bien inportan dan fisie sours (ek fisie sib). Enn fraz sours kapav kouma sa:

OmegaT, toutfwa, pou montre ou fraz-la sa manier-la:

Bann baliz dan OmegaT zot gri, donk li fasil pou rekonet zot. Zot proteze, donk ou pa kapav fer okenn modifikasion lor zotmem, me ou kapav siprim zot, ekrir zot manielman ou deplas zot dan ou fraz sib. Toutfwa, si ou finn fer bann erer letan ou finn ekrir bann baliz formataz, kapav ou bann dokiman final par pou ouver. Donk, apiy lor Ctrl+Shift+V avan ou kree ou bann fisie final, pou chek sipa ou bann baliz korek.

Kree ou tradiksion final

Kan ou sir ki pena okenn erer baliz dan ou proze, apiy lor Ctrl+D pou kree bann fisie sib dan sou-dosie /target/ dan dosie ou proze.

Detrwa lot pwin ki ou bizin kone

  • Si enn fisie pa pe ouver dan pano Editer, kapav li dan enn format ki pa konpatib avek OmegaT. Get Opsion → Preferans... → Filt Fisie pou enn lalis bann format file konpatib avek OmegaT.

  • Ou kapav kree enn nouvo proze pou sak nouvo travay, ek ou kapav azout enn fisie sours dan enn proze ninport ki moman.

  • Pou chek bann paramet ou proze, apiy lor Ctrl+E pou ouver lafnet propriyete proze. Pou aksed lalis bann fisie ou proze, apiy lor Ctrl+L pou ouver lafnet Bann Fisie Proze.

  • Kan ou terminn ou tradiksion, OmegaT export trwa memwar tradiksion level1, level2 ek omegat dan dosie ou proze. Bann itilizater lot program tradiksion kapav ouver bann memwar level1 ek level2. Par kont, zis OmegaT kapav servi memwar omegat, ek ou kapav servi sa memwar-la dan ninport ki proze fitir avek OmegaT. Si ou met sa bann fisie memwar tradiksion la dan sou-dosie /tm/ ou proze, OmegaT pou otomatikman sey trouv bann segman similer kan ou tradir lezot segman. Apel sa bann segman-la bann "korespondans".

  • Pou azout enn nouvo term dan gloser, apiy lor Ctrl+Shift+G, ouswa kopie bann gloser existan dan sous-dosie /glossary/ dan dosie ou proze, ek OmegaT pou rod bann term ladan otomatikman.

  • Parfwa, li bien itil fer bann resers dan ou text sours ek dan ou tradiksion: servi Ctrl+F pou fer lafnet Resers Textiel aparet ninport kan.